روائع أبو السيد

استعرض الموضوع السابق استعرض الموضوع التالي اذهب الى الأسفل

روائع أبو السيد

مُساهمة  بركات في الإثنين مارس 21, 2011 1:01 am

ضليت

ضليت .. هرب منى الأمل .. جنيت

جافانى الشروق .. حنيت

كنتى معايا .. فى لمـّة دليب .. شاشاى
فى إيقاع حشا المردوم

فى جيد الزمن .. سوميت

************
مرقت .. على محطات السفر .. غربة

وما لقيتك .. أمل شارد

مع إنك معاى فى زحمة المشوار

وحتى يقينى عاد من تانى

صحـّاك فى حنين ذاتى ..
نجم الفرحة يا عايد

*********
تعالى معاى....
تعالى معايا من زفة نفس مسدار

وما جرتق فرح .. كانت

ولا طعم الشقا الروّح

خطاى هانت

وإنتى معانى شايلاها القوافى

معزة فى عمق الفرح .. دوبيت

وكت ضليت

..
قعدتّ براى .. وحسيتك

بتطلعى من نفس طورية ضامـّة الطين

ومن دمعة وجع طوّل

ندا العرق البنادى .. حنين
مساماتك بتتشقق عشان تشرق صباحاتك





مساماتك
مساماتك بتتشقق عشان تشرق صباحاتك
صباحاتك بتتعانق مع الفكرة
وتأخذ من جراحاتك
تضيف أحساسنا بي بكره
ويا بكرة ويا بكرة الغصن ناشف
و يا بكرة الفرح يوماتي بيكاتل حزن أطفال بتتشابا
عشان تعرف شنو الفي أيدينا لي بكرة
شنو الداخرنو للسكة
عشان تقصر مسافاتك
عشان تيرق غماماتك
عشان تخضر مساحاتك
عشان بكرة وبعد بكرة
عشان بكرة ... وبعد بكرة








حليوة ليلة المولد

بقول غنوات .. واقول غنوات
فى البلد البسير جنياتها لى قدام ..
بقول غنوات
وفى الولد البتل ضرعاتو فى العرضة
ويطير فى الدارة صقرية ..
ولو السمحة تلت إيد
ومدت جيد يقوم شايلاه هاشمية
يشيل شبالو وختفة ريد وفرحة عيد ..
وريدة روح وحمرة عين وإيدية
بقول غنوات .. بقول غنوات
وفى الولد البشيل مدقاقو قولة خير على القمرة
يقابل الجاية متحزم ويدارك الجاية متلزم
كلام فاسك على أرضك
يبقى عديلة يا بيضا
ويبقى زفاف تزغرد ليه قمرية
و قبال حول تغيم غيمة قبلية
ترش الدارة والحدبة الصعيد الحلة
يا فرحه بتطارد الصفقة فى النسمة الصعيدية
وياجهرة نهار الليلة بدرية
رحيح جنياتنا فى
الحدبة الصعيد الحلة
يا قمحاتنا هو لبلب ...
يا سمحاتنا هو لبلب
و يا اللوز الفتق فى الوادى هو لبلب
ويا البحر الطمح مدادى هو لبلب ..
ويا حجواتنا يا دعواتنا هو لبلب
سألتك بالذى ركز الأرض معبد
وسوى الناس عليها مقام
سألتك بى حجا الأمات ودعواتنا ..
سألتك بى كبيداتن و دمعاتنا
شليل وين راح ..
يكون ضل الخريف فاتنا
وشليل وين راح
وزى برق السماك الجابها دغشية
وزى زغرودة البطن الكبارية
مرق من شامة القمرة
مهيقت بى وداعة الله
ومقدم بالعديل يبرا
تعالوا ابشروا ياجنيات
شليل ما راح .. شليل ما فات
شليل عند المسورو حرق بقالو حصاد
شليل فوق التقانت قام خدار وبلاد
شليل مشوار.. شليل مسدار
شليلنا أرضنا يا جنيات
شليل قائم نصاصي الليل
يتمتم ليلو وردية
حرازنا شليل .. شليلنا دليب
شليلنا دليل على البلدات بعد درب التبلدية
شليل ما راح .. شليل ما فات
مزارع بات على عشقين
تراب بلدو
وسماح فوق بت
مزارعية


وجيدة


كانك من وراء صفحة زجاج مبلول
وراك الريح ..
وقدامك مدى السكة ..
و فدى المجهول ..
وانادي ليك .. ونادي ليك
وجيدة .. وجيدة
لا اتلفتي لا لوحتي بايديك
وانادي ليك ..
يجاوبني المدى الفاتح مدارج الهم
وتبقى وجيدة طعنة سيف ..
موسدة في شق السماء المرسوم وسادة
وتبقى ايدينا في ايديك..
وفي المنديل ..






طيبة

كل ما تباعد بيننا عوارض ..
كل ما هواك يا طيبة مكني
تلد الغربة القرب الواحد ..
بيك أسمي الشوق وأكنّي
لما أفوتك من دون خاطر ..
أو دون خاطر مني تفوتي
بلقى حبايب فى كل حتة ..
وكل بيوت الفقراء بيوتي
لا غيرت وراك الجتة ..
لا بدلـت ملامح صوتى
لا غافلنى وهادن فنى ..
رمل المدن الما عرفتنى
تبن الشوق الصبرو مصوبر ..
للارياف الكم وفتنى
وللاطفال الناشفة ضلوعها ..
ونازفة بغنى
أطّمن روعها واهدّى دموعها ..
ببسمة بكرة الماها تمنى
ولا مصنوعة
أغنى لشعبى ومين يمنعنى ..
أغنى لقلبى إذا لوعنى
مخير دربى اللي ما رجعنى ..
إذا طلعنى نخلة القر
ولا الغربة الكدرومية ..
تنزل غنوتى بقمرية
أو وقعنى فى بطن الجب ..
يطلع يوسف بألاغنية
أغنى الناس الما بتسمعنى ..
المنى بعيده المبعد عنى
النادى نشيدها وكنت المعنى ..
الأيدى فى إيدها..
وإيدها بتبنى
فى دنيا جديده
اليوم راح تبنى ..

بركات

المساهمات : 59
تاريخ التسجيل : 12/12/2010

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى